تعالي يا مصر ضميني

تعالي يا مصر ضميني
وخبيني
تعالي شوفيني قدامك
لا باتكلم ولا باقدر اقول الآه
والهم كتمته في نفسي .. لا بانطقه ولا بانساه

***
تعالي يا مصر ضميني
وخبيني م الفيران والسوس
السوس يا بلدي .. بينخر في القلوب بالموس
السوس بيسكن فينا ويعربد
بينام ويتمدد
واحنا يا بلدي ع اللي فات .. بنتعدد

***

تعالي يا مصر احميني
ولاد شبه اولادك يباذوني ويبكوني
ولدان شبه اولادك .. لكنهم ولاد الكلب
تعالي يا مصر زقيهم .. ونضفي القلب

***

الدنيا يا مصر بتقولنا من الهموم شيلوا
اصبحنا في نظر الخلايق .. ما نسوى من الخضار كيلو
بنموت يا امي بالكيلو
في القطر والطيارة والباخرة والشارع
واحنا يا مصر .. ما لناش غير ربنا
ندعيله ونشكيله

***

تعالي يا مصر ضميني
انا مصري .. فلسطيني ولبناني
انا عراقي وسوداني
وباموت يا امي كل يوم والتاني

***

يا امي انا خايف
انا شايف ومش شايف
انا عارف ومش عارف
السوس يا امي لفنا بلفايف
قعدنا نحلف باسمه وهو بالشيطان حالف

محمود ياشا